محب اور محبت

بہت سی اداس اور پریشان کن دنوں اور خبروں کے بعد آج فرحت کیانی کی پوسٹ امید ابھی کچھ باقی ہے دیکھ کر اداسی کم ہوئی اور پوری پڑھنے کے بعد امید کی بجھتی ہوئی کرنیں پھر سے جلنے لگیں۔ خاص طور پر یہ جملے  پڑھ کر

متاثرینِ سیلاب کے لئے لگائے گئے جس کیمپ  سے گزرتے ہوئے مجھے کبھی دو چار لوگوں اور آٹھ دس تھیلوں کے سوا کچھ نہیں دکھائی دیتا تھا وہا ں سے ہر شام 3 ٹرک امدادی سامان لیکر متاثرینِ سیلاب کی اور نکلتے ہیں۔

اس کے بعد عمران خان کی پکار پر قوم کی مدد ، ایدھی صاحب کی ایپل پر لوگوں کی کروڑوں کی امداد ، یہ سب پڑھ کر بہت اچھا لگا اور وہ اداسی، پریشانی کم ہونے لگی جو مسلسل پریشان کن اور مصائب پر مبنی خبروں سے بڑھتی جا رہی تھی۔

اس کے بعد جعفر کی پوسٹ   آیئے پڑھی جسے بہت اچھے انداز میں جعفر نے لکھا اور فیشن کے مطابق چند مخصوص گروہوں کو کوسنے ، چند طبقات کو ذمہ دار ٹھہرانے اور ملک اور قوم کا نوحہ پڑھنے کی بجائے جس چیز کی اشد ضرورت ہے وہ ہے جذبہ ہمدردی اور ایثار ان آف زدوں اور مصیبت زدوں کے لیے جو اس آفت ناگہانی کا شکار ہوئے ہیں۔ کچھ دیر کے لیے اگر سوچا جائے کہ ایک رات کو سوتے ہوئے ان لوگوں کے پاس گھر  ، سامان ، اناج اور مال مویشی تھے اور اگلے دن نہ ان کے پاؤں تلے زمین تھی اور نہ سر پر چھت۔ نہ سر چھپانے کو جگہ نہ تن ڈھانپنے کے لیے پورے کپڑے ، کھانا ایک طرف پینے کے لیے صاف پینے تک کو ترس گئے ہیں۔ جو گندا اور بدبودار پانی جانور پی رہے ہیں وہی پینے پر مجبور ہیں اور اس کے ہاتھوں بیمار بھی ہو رہے ہیں اور مر بھی رہے ہیں۔ امداد کم اور ضرورت مند زیادہ ہیں جس سے امداد آتی بھی ہے تو اسے لینے میں جو کشمکش اور چھینا جھپٹی ہوتی ہے وہ ایک اور ہی دل خراش داستان ہے۔

اچھی خبر یہ ہے کہ لوگ جو اب تک گومگو کی کیفیت میں تھے اور امداد دینے میں یا تو کشمکش کا شکار تھے یا اس سانحے کی سنگینی کا اندازہ نہیں کر پا رہے تھے اب میدان میں نکل کھڑے ہوئے ہیں اور بڑھ چڑھ کر مدد کر رہے ہیں۔

طلعت اور کاشف عباسی کے اکاؤنٹ میں بیس جولائی تک چار کروڑ سے اوپر رقم جمع ہو چکی ہے اور یہ صرف چند دن میں بغیر زیادہ ترویج اور چندہ مہم کی مسلسل اپیل کے بغیر۔ طلعت اور کاشف نے اس امدادی کام کو شفاف رکھنے کے لیے ویب سائٹ اور اس پر اکاؤنٹ کی تفصیل دے رکھی ہے جو یہاں پر دیکھی جا سکتی ہے۔

ریلیف آج ویب سائٹ

اس سائٹ پر کال کرنے اور ایس ایم ایس کرنے کے لیے نمبر موجود ہیں ۔ اس کے علاوہ سائٹ پر بینک اسٹیٹمنٹ اور آئندہ خرچ ہونے والی رقم اور منصوبہ جات بھی ہوں گے۔

عمران خان فلڈ ریلیف  اور میر خلیل الرحمن فاؤنڈیشن کی پہلی ٹیلی تھون میں ہی تقریبا سات کروڑ جمع ہو گئے اور عمران کا کہنا ہے کہ وہ اتوار کے روز کم از کم پانچ سو ٹرکوں کا امید کارواں لے کر  خیبر پختونخواہ کی طرف روانہ ہوگا تاکہ ناکافی امداد کا سلسلہ ختم ہو اور لوگوں کو حوصلہ ملے کہ منظم انداز میں ان کی مدد ہو رہی ہے ۔ اس کے بعد یہ ٹرکوں کا کارواں جنوبی پنجاب ، سندھ اور بلوچستان کی طرف روانہ ہوگا دو ہفتوں کے دوران۔ اس کے بعد لوگوں کی بحالی اور انہیں اپنے پیروں پر کھڑا کرنے کے لیے لگاتار کوشش جاری رہے گی۔ اس ٹیلی تھون کو پکار کا نام دیا گیا اور اندرون ملک اور بیرون ملک پاکستانیوں نے اس پکار پر لبیک کہا اور پانچ کروڑ کے ہدف کو با آسانی پورا کرتے ہوئے تقریبا سات کروڑ جمع کروا دیے۔ جذبوں کو جواں رکھنے اور اپنا حصہ ڈالتے رہنے کی ضرورت ہے تاکہ ہمارے وہ بہن بھائی اور بزرگ جو اس افتاد سے بے گھر ہوئے ہیں وہ اپنے گھروں میں بس سکیں۔ کاش لوگ جس طرح عمران کو پیسے دیتے ہیں اس طرح ووٹ بھی دے دیں۔ اس سیلاب نے بھی لوگوں کی آنکھیں نام نہاد سیاستدانوں کی طرف سے نہ کھولی تو کونسی آفت کھلوائے گی۔

پکار ٹیلی تھون میں میزبان ساحر نے اقبال کے سحر انگیز تین اشعار پر پروگرام کا اختتام کیا جس کے ایک مصرعہ پر فرحت نے بھی اپنی پوسٹ کا اختتام کیا۔

دگرگوں ہے جہاں تاروں کی گردش تیز ہے ساقی

دل ہر ذرہ میں غوغائے رستا خیز ہے ساقی

متاع دین و دانش لٹ گئی اللہ والوں کی

یہ کس کافر ادا کا غمزۂ خوں ریز ہے ساقی

نہیں ہے ناامید اقبال اپنی کشت ویراں سے
ذرا نم ہو تو یہ مٹی بہت زرخیز ہے ساقی

ملک کا پانچواں حصہ زیر آب اقوام متحدہ کے مطابق ، ملک کی آبادی کا ایک تہائی  حصہ سیلاب سے متاثر ہو چکا ہے ۔

اعداد میں بات کی جائے تو ڈیڑھ سے دو کروڑ پاکستانی اس سیلاب سے براہ راست متاثر ہو چکے ہیں جن میں سے ساٹھ لاکھ کے قریب بچے ہیں۔ اموات کی تعداد تقریبا پندرہ سو، دو ہزار  سے چار ہزار کے قریب  بتائی جا رہی ہے۔

پانچ لاکھ ٹن سے زائد گندم اور دو لاکھ ٹن سے زائد کپاس کی گانٹھیں بہہ گئی ہیں اور مجموعی طور پر اسی فیصد فصلیں تباہ ہو گئی ہیں۔

ایک لاکھ سے زائد مویشی ہلاک ہو کر پانی میں بہہ چکےہیں اور اب ان کی وجہ سے تعفن اور بیماریاں پھیل رہی ہیں جس میں خصوصی طور پر سانس کی ، ہیضی کی اور جلد کی بیماریاں پھیل رہی ہیں۔

اس تمام قیامت خیز ہنگامے اور طوفان میں اگر خاموشی ہے تو بین الاقوامی اداروں کے طرف سے امداد کی جو کہ نہ ہونے کے برابر ہے اور گذشتہ قدرتی آفات کے مقابلے میں انتہائی کم۔

اس سے پہلے پاکستان میں زلزلے کے دوران تقریبا 247 ملین ڈالر کی امداد کا وعدہ کیا گیا تھا

میانمیر برما میں تقریبا 110 ملین ڈالر کی امداد کا وعدہ ہوا تھا

ہیٹی میں تقریبا 742 ملین ڈالر

اور اس دفعہ سیلاب کے لیے  45 ملین ڈالر سے بھی کم اور صرف پانچ ممالک کی امداد پانچ ملین ڈالر سے زائد ہے جس میں امریکہ ، آسٹریلیا ، اٹلی ، یوکے اور کویت شامل ہیں۔  اقوام متحدہ کی طرف سے ہنگامی امداد کے 450 ملین ڈالر کی اپیل کی گئی ہے جس کے نیتجے میں امداد کے وعدے بڑھ کر 150 ملین ڈالر تک پہنچی ہے جس میں جانےکتنی حقیقی طور پر پاکستان پہنچے گی کیونکہ ماضی میں بھی امداد کے وعدے تو کافی ہو جاتے ہیں مگر امداد کم ہی پہنچتی ہے۔

زلزلے کے مقابلے میں اس دفعہ ملک میں اور بیرون ملک پاکستانیوں کی طرف سے بھی امداد بہت ہی کم ہے اور لوگ شش و پنج میں مبتلا ہیں جس کی کئی وجوہات ہیں۔ جن میں سے ایک بڑی وجہ تو یہ ہےکہ زلزلے میں بہت زیادہ اموات ہو گئی تھیں اور میڈیا نے اس پر بہت بروقت اور تیزی سے کام کیا تھا جس سے اس سانحے کی سنگینی بہت جلد واضح ہو گئی تھی۔ دوسرا وہ سانحہ ایک مخصوص علاقہ میں تھا جس پر تمام ملک کی توجہ مرکوز ہو گئی تھی اور بیرون ملک پاکستانی تک بھی بڑے موثر انداز میں امداد کی اپیل کی گئی تھی اور انہیں متحرک کیا گیا تھا۔ تیسرا لوگوں کی معاشی حالت بہتر تھی اور ان میں مدد کرنے کی سکت بھی  آج کے مقابلے میں کہیں زیادہ تھی ۔ چوتھی اور سب سے اہم وجہ لوگوں کی بد اعتمادی اتنی ہمہ گیر اور بے حسی کی حد تک بڑھی ہوئی نہیں تھی جیسی کہ اس دفعہ ہے۔

اس بے حسی کو دیکھ کر جی بہت کڑھ رہا تھا مگر چند دنوں سے اس میں تبدیلی نظر آنا شروع ہوئی جس میں ایک اچھی خبر عبدالستار ایدھی کا متحرک ہونا ہے اور ان کا کہنا ہے کہ دو کروڑ سے متاثرین کی امداد کی ہے اور مزید چھ کروڑ سے آئندہ چند روز میں مدد کی جائے گی۔ اس کے علاوہ شہزاد رائے ، فخر عالم بھی ٹی وی پر نظر آ رہے ہیں اور وہ امدادی کاروائیوں میں اپنے ماضی کی طرح سرگرم ہیں۔ فخر عالم کے مطابق پی آئی اے نے ملک اور بیرون ملک سے مفت کارگو کی سہولت فراہم کرنے کا یقین دلایا ہے۔ اس کے علاوہ مشہور صحافی اور ٹی اینکر کاشف عباسی اور طلعت حسین نےملک کر ایک سیلاب زدگان کی مدد کے لیے ایک ریلیف اکاؤنٹ قائم کیا ہے جہاں پیسے جمع کروائے جا سکتے ہیں ملک اور بیرون سے۔ یہ اکاؤنٹ شفاف ہوگا اور اس کی شفافیت کے لیے ایک ویب سائٹ بھی بنائی جائے گی جہاں سے رقوم کی ترسیل اور ان کی فراہمی کو دیکھا جا سکے گا۔ یہ اکاؤنٹ اس لیے قائم کیا گیا ہے تاکہ جو لوگ اعتماد کے فقدان کا شکار ہیں وہ اس میں پیسےجمع کروا سکیں تاکہ لوگوں کی مدد جاری رہ سکے۔ تفصیلات کچھ یوں ہیں

Account Details for Flood Relief
Title of Account: Syed Talat Hussain/ Kashif Abbasi
Account No: 0516616341000689
Bank: Muslim Commercial Bank
Branch: Stock Exchange Branch, Blue Area, Islamabad
Branch Code: 1390
Swift Code: MUCBPKKAA

اس کے علاوہ مندرجہ بالا فون پر کال کرکے معلومات حاصل کی جا سکتی ہے

Tel: +92-51-111010010

اور نیچے دیے گئے کاشف عباسی اور طلعت حسین کے نمبروں پر ایس ایم ایس کرکے رقوم عطیہ کی جا سکتی ہیں۔

SMS: +92-347-5023842, +92-301–54735

اس کے علاوہ عمران خان کو بھی میں نے جاوید چودھری کے پروگرام میں کہتے سنا ہے کہ اس نے چند لاکھ ڈالر سیلاب زدگان کے لیے اکٹھا کیے ہیں اور مزید کے لیے وہ اپنی ٹیم کے ساتھ کوشش کریں گے۔ ان میں سے جس پر بھی اعتماد ہو اس ادارے یا شخص کو جتنی توفیق ہو اتنی مدد ضرور کرنی چاہے اور خود نہ زیادہ کر سکیں تو اس کے لیے دوسروں کو متحرک کریں یا مل کر کوشش کریں۔

اب تک کی اطلاعات کے مطابق لاہور میں دو مقامات ماڈل ٹاؤن اور گڑھی شاہو میں احمدیوں کی دو عبادت گاہوں پر دہشتگردی کے حملے میں بیاسی افراد لقمہ اجل بن گئے اور سو سے زائد زخمی ہیں۔

انتہائی افسوسناک اور قابل مذمت واقعہ ہے یہ اور پورے ملک میں شاید قتل و غارت اور جان و مال کی بے قدری کو یقینی بنایا جا رہا ہے۔ کچھ دن پہلے ہی کراچی میں اس قدر فائرنگ اور قتل ہوئے اور اب اب بیاسی لوگ لاہور میں دہشتگردی کی اس ظالمانہ اور سفاکانہ کاروائی کی بھینٹ چڑھ گئے۔
حکومتیں بیٹھ کر صرف تماشہ اور لوٹ مار کر رہی ہیں ، شہریوں کی جان و مال کی حفاظت اب ان کی اپنی ہی ذمہ داری رہ گئی ہے۔

محاورتہ نہیں حقیقتا اگر ملک کو اس دگرگوں حالت سے نکالنے کے لے جنگی بنیادوں پر کام نہ کیا گیا اور تمام شرپسندوں سے آہنی ہاتھوں سے نہ نمٹا گیا تو شاید کرغزستان والا حال زیادہ دور نہیں۔

سولہ دسمبر تمام  پاکستانیوں کے لیے یوم سوگ ہوتا ہے۔ اس دن ہمارا ایک بازو ہم سے کٹ گیا تھا اور ہمارے بڑوں نے کمال سنگدلی اور بے حسی سے اس بازو کا نہ صرف کٹنا گوارا کر لیا بلکہ اسے جوڑنے کی کوئی کوشش بھی نہ کی۔

وہ جو کبھی “ہم“  تھے  آج  “میں“ اور “تم“  کیسے ہوگئے

چونکہ صوبائیت کا  زہر ہر طرف کار فرما ہے اور اچھے خاصے باعلم  پڑھے لکھے غیر جانب دار لوگ بھی اس کا شکار ہو رہے ہیں اس لیے میں نے فیصلہ کیا ہے اب ہر شخص کے ساتھ اس کی قومیت ضرور لکھوں گا تاکہ پڑھنے والے کو قوم کا پتہ چل سکے۔

ابھی بھی فقط ادھورے سچ کا ذکر جاری ہے ابھی بھی سارا قصور پنجابیوں کا نکالا جا رہا ہے جس میں سب سے زیادہ سیاہ کردار پٹھان ایوب کا تھا جس نے کتا کتا کہلوا کر بھی جاتے جاتے اقتدار اپنے ہی بنائے ہوئے آئین کی بجائے پنجابی چیف آف آرمی سٹاف یحیی کو دے گیا۔ تین کرداروں میں ایک کا تعلق سندھ سے ایک کا پنجاب سے اور ایک کا بنگلہ دیش سے تھا۔ پنجاب سے تعلق رکھنے والے یحیی کا نام تو سیاہ حروف سے لکھا جاتا ہے اور لکھا جانا بھی چاہیے مگر سندھی بھٹو اور بنگالی مجیب کا سیاہ کردار، روشن اور ہیرو کے طور پر پیش کیا جاتا ہے اس پر کب احساس ہوگا ہمیں اور کب لکھا جائے۔ بنگالیوں کو ایسے پیش کیا جاتا ہے جیسے ان سے زیادہ دنیا کی کوئی قوم مظلوم تھی نہ ہے جب کہ ان کی اپنی حرکات بھی بہت سیاہ تھی اگر ان پر ظلم ہوا تو انہوں نے بھی ظلم کی انتہا کر رکھی تھی اور مظالم کے لیے وہ سب سے زیادہ خود ذمہ دار ہیں۔ پہلا مارشل لا اسکندر مرزا نے لگوایا ایوب کو بلوا کر ۔ ایوب مرزا پٹھان تھا اور اسکندر مرزا بنگالی اور جس وزیر اعظم کو برطرف کیا گیا وہ پنجابی۔ اصولا تو یہ پنجاب کے ساتھ پٹھان اور بنگالی قوم کی زیادتی تھی مگر کمال خوبی سے یہ پنجاب کے حصہ میں ڈالی جاتی ہے۔ پھر جاتے جاتے پٹھان ایوب  اقتدار  پنجابی یحیی کو دے کر گیا ، اس لحاظ سے بھی پٹھان ایوب کا کردار پاکستان میں سب سے سیاہ ہے۔ پھر بنگالی مجیب اور سندھی بھٹو کی اقتدار کے لیے خونی کشمکش اور دونوں کا انجام ساری دنیا کے سامنے ہیں فقط ہمارے سوا۔ ایک کو اسی کی قوم نے گولیوں سے بھون ڈالا دوسرے کے اسی کی قوم نے پھانسی دے ڈالی۔ پنجابی یحیی تو اپنی زندگی میں ہی مر گیا تھا اور گمنامی کی زندگی گزاری ، افسوس کہ سندھی بھٹو نے اسے عزت سے دفن ہونے دیا حالانکہ پوری قوم کو اس کے سیاہ کارنامے بتانے چاہیے تھے اور عدالت سے اس کے گناہ کو ثابت کرنا چاہیے تھا مگر یہ تو تب ہوتا اگر سندھی بھٹو مخلص ہوتا۔

سولہ دسمبر کو اس سال سقوط ڈھاکہ  کے  38 سال بعد سقوط  کرپشن ہوا ہے جو قوم کی مشترکہ جدوجہد اور قربانیوں  کا ثمر ہے۔ قدرت نے اپنا فیصلہ دے بھی دیا اور سمجھا بھی دیا ہے ۔

کیا ہم اب بھی سمجھنے سے قاصر ہیں کہ مشیت  ایزدی کیا  ہے  !!!!!

جن آنکھوں کو
خواب محبت کی پہلی من موہنی دستک سے کھلنا تھا
وہ آنکھیں اک وحشت ناک دھماکے
کے خونی جھٹکے سے…بند ہوئی ہیں
بھورے بھورے بال الجھے ہیں… اک جھاڑی سے
تن کی دھجی دھجی رستوں پر بکھری ہے
مارنے اور مرجانے کی اندھی خواہش میں
کس بدلے کی بھاونا… اک شعلے کی صورت
اس نازک تن میں جلتی تھی
دشمن کو بن پہچانے ہی
بیس برس کے اس سینے میں
کیوں اتنی نفرت پلتی تھی؟
بیس برس کی عمرتو ماں کی سبز دعاؤں سے اُگتی ہے
بیس برس کی آنکھوں کے محمل میں تو لیلیٰ رہتی ہے
بیس برس کا دل تو عشق کی اونچی لَو سے
سرخ چراغ بنا رہتا ہے
اپنے انجانے جذبوں کا
خود ہی سراغ بنا رہتا ہے
کس نے تمہارے روشن دل کو نفرت کرنا سکھلایا تھا
لمبی عمر کی… سبز دعاؤں والی رُت میں
کس ظالم نے موت کا سپنا دکھلایا تھا؟
کس نے کہا، اس آگ میں جل کر تم کو شہادت مل جائے گی
کس نے بتایا، موت کی کالی راہ پہ جنت مل جائے گی
بیس برس کے کم سنِ دل کو
پہلی چاہت مل جائے گی؟
~~~
( ثمینہ راجہ )

خدا کرے کہ مری ارض پاک پر اترے
وہ فصلِ گل جسے اندیشۂ زوال نہ ہو

یہاں جو پھول کھلے وہ کِھلا رہے برسوں
یہاں خزاں کو گزرنے کی بھی مجال نہ ہو

یہاں جو سبزہ اُگے وہ ہمیشہ سبز رہے
اور ایسا سبز کہ جس کی کوئی مثال نہ ہو

گھنی گھٹائیں یہاں ایسی بارشیں برسائیں
کہ پتھروں کو بھی روئیدگی محال نہ ہو

خدا کرے نہ کبھی خم سرِ وقارِ وطن
اور اس کے حسن کو تشویشِ ماہ و سال نہ ہو

ہر ایک فرد ہو تہذیب و فن کا اوجِ کمال
کوئی ملول نہ ہو کوئی خستہ حال نہ ہو

خدا کرے کہ مرے اک بھی ہم وطن کے لیے
حیات جرم نہ ہو زندگی وبال نہ ہو

اللہ رے زرداری کی معصومیت قبلہ فرما رہے ہیں کہ میں کبھی بھی جسٹس افتخار کے خلاف نہیں تھا فقط ڈوگر کی ریٹائرمنٹ کا انتظار کر رہا تھا۔ یہ ایک چھوٹی سی چیز تھی مگر اس چھوٹی سی چیز نے بڑے بڑے لوگوں کو بے نقاب کر دیا۔ اس موقع پر انہوں نے یہ شعر بھی دہرایا کہ

گو ذرا سی بات پر برسوں کے یارانے گئے

لیکن اتنا تو ہوا کہ کچھ لوگ پہچانے گئے 

ویسے تو زرداری اب سخت مقابلہ کرتے ہوئے مولانا فضل الرحمان کو ببانگ دہل جھوٹ بولنے میں پیچھے چھوڑ چکے ہیں مگر پھر بھی اس تازہ تازہ جھوٹ کے لیے ان کا ابھی دو دن قبل کا بیان ملاحظہ کر لیں۔

جنگ چودہ مارچ کی یہ خبر دیکھیں

صدر نے لانگ مارچ اور دھرنا تحریک کو سیاسی چیلنج قرار دیا اور کہا کہ افتخار محمد چوہدری کی بحالی کوئی ایشو نہیں ہے۔ انہوں نے کہا کہ افتخار چوہدری بحال ہوں گے اور نہ ہی پنجاب میں گورنر راج ختم ہوگا، سلمان تاثیر بدستور گورنر پنجاب رہیں گے۔ ذرائع کا کہنا ہے کہ صدر زرداری نے دو ٹوک کہا کہ حکومت کسی کمزوری کا مظاہرہ نہیں کرے گی اور سیاسی چیلنجز کا مقابلہ سیاسی طریقے سے کیا جائیگا۔

سیاسی چیلنج قبول کرنے اور کسی کمزوری کا مظاہرہ نہ کرنے والے مرد حر کی کمزوری ڈیڑھ دن میں ہی سامنے آ گئی اور پہلے مرحلے پر افتخار چوہدری صاحب کو تو بحال کرنا پڑ گیا ہے دوسرے مرحلے پر گورنر راج اور اس کے ساتھ سلمان تاثیر کو بھی رخصت پر بھیجنا پڑے گا۔ پیپلز پارٹی والوں کا عجب حال ہے اور ڈھٹائی کی حد ہے کہ فخر سے بتا رہے ہیں کہ شہید بینظیر بھٹو کا اور زرداری کا وعدہ پورا کر دیا ہے ، ہم تو شروع سے ہی وعدہ پورا کرنا چاہتے تھے ( مگر نواز شریف لانگ مارچ کر ہی نہیں رہا تھا ) اب مناسب موقع پر یہ وعدہ پورا کر دیا ( جب عوامی طاقت کے سامنے بالکل نہ چلی)۔

اس کے ساتھ ساتھ ایم کیو ایم نے سندھ دھرتی کے خلاف نعروں کا نوٹس نہ لینے پر اڑتالیس گھنٹوں میں حکومت سے علیحدگی کا نوٹس چوبیس گھنٹوں میں واپس لے کر اصول پسندی اور مفاہمت کی روشن مثال قائم کی ہے( اس طرح کی پھلجڑیاں چھوڑنے کی ماہر جو ٹھہری ویسے سندھ کارڈ اس دفعہ بری طرح سے ناکام رہا آئندہ الطاف بھائی دیکھ کر استعمال کیجیے گا)۔ اس کے ساتھ انہوں نے بھی ججوں کی بحالی کو خوش آئین قرار دیا ہے( مجبوری کا دوسرا نام سیاست شاید اس کو کہتے ہیں)۔

ابھی ابھی پاکستان وقت کے مطابق سولہ مارچ صبح دو بجے یہ خبر جیو نیوز پر آ رہی ہے کہ چیف جسٹس کو بحال کر دینے کا فیصلہ کر لیا گیا ہے اور چوہدر ی نثار نے کامران خان کو بتایا ہے کہ حکومت کی طرف سے یہ پیغام پہنچا دیا گیا ہے کہ ابھی چند منٹ میں وزیر اعظم یوسف رضا گیلانی قوم سے خطاب میں چیف جسٹس اور دو نومبر کی عدلیہ کی بحالی کا اعلان کریں گے۔ وکلا چیف جسٹس کے گھر کے سامنے جمع ہو گئے ہیں اور کامران خان نے شہباز شریف کے پانچ مارچ کے جلسہ میں کی گئی پیشن گوئی کو سنوایا کہ لانگ مارچ ابھی جہلم تک نہیں پہنچے گا کہ چیف جسٹس بحال ہو جائیں گے اور ایسا ہی ہو رہا ہے۔

قوم کو مبارک ہو۔

ابھی چند دن پہلے ہم سب امید سے ہیں پر زرداری پر یہ گانا سنا اور سوچا کہ اس پر ایک تحریر لکھی جائے جو  حسب معمول تاخیر سے لکھ رہا ہوں اور چند اور دلچسپ خبریں جمع ہو گئی ہیں۔ پہلے گانا ہو جائے جتنا مجھے یاد ہے اور جس طرح یاد ہے

زورداری ہوں

اور سب پہ بھاری ہوں

زورداری ہوں

موج میں ہوں کہ اوبامہ کی ذمہ داری ہوں

زورداری ہوں

سلمان ، بدر ، رحمان ملک پہ واری ہوں

زورداری ہوں

سب گردش میں ہیں اور میں ان پہ طاری ہوں

زورداری ہوں

شاید کچھ عرصہ زورداری ابھی شریفوں پہ بھاری پڑتے کہ شریف برادران کو نااہلی اور حکومت سے بے دلی اکھٹی تحفہ میں دے کر زورداری صاحب نے شریفوں کی بل کچھ زیادہ ہی کس دیے جس سے شریف برادران کی رہی سہی شرافت نے دم توڑ دیا اور یکایک ان پر زورداری کی چالاکی سے کئی گئی ہوشیاریاں اور دھوکے یاد آ گئے اور نرم نرم یاد دہانیاں گرما گرم محاذ آرائی میں بدل گئیں۔ نواز شریف کہنے لگے بھرے مجمع میں کہ

زورداری صاحب آپ نے بڑی چالاکی سے مجھے دھوکہ دیا مگر اب آپ کی چالاکی کو ساری عوام جان گئی ہے اور اب آپ مزید چالاکیاں نہیں کر سکیں گے۔

ویسے ایک دفعہ تو زیر لب انسان مسکراتا ہی ہے یہ سن کر اور بڑے شریف کی اس سادہ دلی پر کہ عوام کو تو چالاکیوں کا کافی عرصہ سے پتہ تھا وہ تو آپ کے بیدار ہونے کا انتظار کر رہی تھی کہ کب آپ کی آخری امید پنجاب حکومت ختم ہو اور کب آپ عدلیہ کی آزادی کے لیے ماہی بے آب کی طرح تڑپنے لگیں اور بیچارے وکلا کو بھی بھرپور مدد میسر ہو جو دو سال سے زائد عرصہ سے اس اصولی موقف کے لیے سختیاں اور گرفتاریاں برداشت کر رہے ہیں۔

زورداری نے بھی مشرف کی آٹھ سالہ غلطیوں کو ایک سال میں ہی کر گزرنے کا مشکل ہدف پورا کرکے شریفوں کو سچوں کے ساتھ ہونے کا ایک سنہری موقع فراہم کر دیا اور چار و ناچار شریفوں کو عوام اور وکلا کے موقف کا کھل کر ساتھ دینا پڑ رہا ہے جو قوم پر فی الحال تو ایک کڑا وقت ہے مگر اس طرح کی مشکلات برداشت کرکے ہی قوم صحیح راستے پر چل سکے گی۔ جیو بھی اس اثنا میں قائد اعظم کی سنہری تقریریں ڈھونڈ ڈھانڈ کر قوم کو دن رات سنا رہا ہے اور ساتھ ساتھ زورداری کے وعدے یاد دلا رہا ہے جو سب کو بیوقوف سمجھتے ہوئے یا سب کی یاداشت گولڈ فش جیسی سمجھ کر تھوک کے حساب سے زورداری نے کیے  تھے اور اب دن رات جیو پر سننے کو ملتے ہیں جس کی وجہ سے بھلائے نہیں بھولتے۔ ایک سال کی مختصر مدت میں وعدہ خلافیوں کا ریکارڈ توڑنےکا اعزاز اب یقینا زورداری صاحب کے پاس ہی ہیں مگر افسوس کہ شریفوں نے اب اس ریکارڈ کو مزید بہتر بنانے کا موقع فراہم کرنے سے انکار کر دیا ورنہ زورداری صاحب اب بھی مفاہمت اور مذاکرات کے لیے تیار ہیں۔ ویسے داد دینی پڑتی ہے کہ اتنی مفاہمت اور مذاکرات کے بعد بھی زورداری تھکتے نہیں اور مزید مذاکرات کی دعوت پر دعوت دیئے جاتے ہیں اور تمام مسائل کا حل مذاکرات اور مفاہمت میں ہی ڈھونڈتے ہیں۔ یہ اور بات ہے کہ مذاکرات میں بیٹھ بیٹھ کر اور مفاہمت کر کے شریفوں کی کمر میں درد شروع ہو گیا ہے اور لوگ اب انہیں ہمہ وقت مائل بہ مفاہمت ہی سمجھنے لگے تھے جس سے جان چھڑانے کے لیے انہیں اب مفاہمت سے پہلے عملی اقدامات کی ضرورت محسوس ہونا شروع ہو گئی ہے۔  باتیں لمبی ہو جائیں گی مگر چند مضحکہ خیز اور ہنسی سے لوٹ پوٹ ہو جانے والے حکومتی لطیفوں پر پوسٹ ختم کرتا ہوں۔

زورداری صاحب کو گلی گلی میں گالیاں دی جارہی ہیں اور وہ پھر بھی مفاہمت کے لیے تیار ہیں ۔ ایوان صدر ( حد ہے مفاہمت کی بھئی )

ججوں کی بیٹیوں پر جعلی کیسز بنائے جائیں گے تو پھر حالات تو خراب ہوں گے ۔ رحمان ملک ( اس پر ایک زوردار قہقہہ بنتا ہے )

بلاول ہاؤس کے ترجمان اعجاز درانی نے کہا ہے کہ جیو نیوزکی نشریات صدر آصف علی زرداری کے حکم پربند نہیں ہوئی (یہ ان کے بھوت نے بند کروئی ہیں) ۔ ان کا کہنا تھا کہ جیو کی نشریات بند کرانے میں ضیا کی باقیات(کمال ہے باقیات کہاں کہاں پہنچ گئی ہیں اور کتنی بااثر بھی)  ملوث ہیں۔ جیو نیوز کو آزادی صحافت کے خلاف کام کرنے والوں نے بندکرایا (زورداری اور تاثیر نے تو یہی تو کہہ رہے ہیں سب) ۔ اعجاز درانی نے مزید کہا کہ پیپلز پارٹی خود آزادی صحافت کی حامی ہے اور اس کے لئے ناقابل فراموش قربانیاں دی ہیں ( اس لیے اب وہ ساری قربانیاں برابر کرنے کا حق بھی رکھتی ہے )۔

اس اثنا میں شیریں رحمان کے استعفی کی خبر سن کر خوشگوار حیرت ہوئی کہ ایک وزیر کا ضمیر تو زندہ نکلا۔